تفكيرات بسيطة تدل على وجود الله (بالدارجة المغربية)

شفت واحد الأغنية.. صراحة ماقنعتنيش.. هي مضمون ديالها على الإلحاد وكيشكروا لعقل حيت منحهم التفكير.. المهم مانديرش الإشهار ديالها ومغنذكرش الاسم ديالها.. ونطلب حتى الناس ليغيقوموا بالتعليق على هاد المنشور ميذكروش الاسم ديالها وميحطوش الرابط ديل الأغنية.. ولي غيديرها غانمسح التعليق ديالو.. المهم غانقول بعض الملاحظات على الأغنية من وجهة نظري الخاصة.. هاد الناس ليكيشكروا العقل حيت كيفكروا بيه ماسولوش راسهم شكون ليعطاهم هاد لعقل.. وباياش عرفوا بلي لعقل عندهم كيفكروا بيه؟! ياك لعقل مكيتشافش.. هادشي بطبيعة الحال إلى تبعنا المنطق ديالهم.. حيت هما مكيآمنوش غي بشيحاجة ليكيشوفوها.. ثانيا إلى الواحد بقى كيفكر مزيان وكيتأمل فالكون ويتأمل فراسوا مزيان واستعمل الفطرة ليموجودة فيه غيتوصل بلي الله تعالى موجود وأنه هو خالق لهذا الكون.. نعطيكم مثال بسيط.. نسبة الأوكسجين فالكون.. عندها واحد المقدار.. داك المقدار إلى تزاد بشوية نقولوا تزاد ب 0.1 الكرة الأرضية غاتحرق كاملة وإلى نقص ب 0.1 الكرة الأرضية غاتجمد كاملة.. وهاد الدراسة ماشي أنا ليقلتها .. قالوها العلماء المتخصصين.. هادي إلى تأملتيها مزيان غاتخليك تفكر تقول نيت راه الله تعالى موجود حيت جعل كل شيء بالمقدار ديالو مازايد ماناقص.. كون كان الأمر صدفة مغيكونش بهاد الدقة.. نزيدكم مثال آخر.. وهاد المثال كيذكروا بالعلوي الله يحفظوا بطريقة مضحكة ولكن فيه شيحوايج كاتستحق التأمل.. البقرة كاتاكل الربيع ومن خلاله ماتخرج لينا لحليب زوين وصافي.. إوة أسيدي جيبلينا شي ماكينة نعطيوها الربيع تستخرجلينا لحليب.. يعني إلى فكرتي مزيان كيفاش البقرة كاتاكل الربيع وتعطينا لحليب والحاولي ياكل من نفس الربيع ومكيعطيناش لحليب؟! زعما الأمر بالصدفة؟! راه هنايا كاتبان القدرة ديل الله تعالى.. وكيبان بلي كاين الله تعالى وأنه موجود.. وأنه هو خالق هذا الكون.. شوف غي الكون كيفاش كبير والبحار والسماء والجبال.. هادشي كامل كيدل على وجود الله تعالى.. الواحد خص يخدم عقلوا بشكل بسيط وغيتوصل لهاد النتائج.. ومابغيتش نذكر الأمور علمية حيت أنا ماشي تخصصي فداكشي.. أنا ذكرت ليكم أمور بسيطة لي أي واحد ممكن يتوصل ليها.. المهم هذا غي الجزء الأول.. وللحديث بقية.. مازال غانرد على شي حاجات ماقتنعتش بيهم.. وراني عارف شيوحدين مغتقنعومش الهضرة ديالي.. المهم أنا رسالتي ليبغيت نوصلها راه حتى أنا كانفكر وعندي لعقل وكانميز بين الأشياء.. ماشي حيت متبع دين الإسلام أني مكنفكرش..!! حيت هما هاد الملحدين ولا لا دينيين عاندهم هاد المنطق نتا مسلم ولا مسيحي ولا... راك مكتفكرش.. والحمد لله الدين الإسلامي كيشجع على التفكير.. والقرآن الكريم عامر بالآيات تدعوا إلى التفكر "أفلا يتدبرون.. أفلا يعقلون.. أفلا يتفكرون.." والدين الإسلامي افتح باب الاجتهاد وعطاه منهج وقوانين باش الواحد يجتاهد.. المهم الدين لا يمنع من التفكير.. بل هو يساعدك عليه.. وللحديث بقية..

 - عبد الحميد الحرشي -